Eizawnna leh Rawngbawlna :

    Eizawnna leh Rawngbawlna hi thil pawimawh tak pahnih insu buai lo leh inhne rem taka kalkawp tur, a kalkawp that chuan ram tan pawha hmasawnna pawimawh tak keng thei a ni tih kan hre tlang ngei ang a.  Pakhat zawk dah pawimawh lutukna hian pakhat zawk a tihchhiat theih avangin fimkhur taka ngaihtuah chunga kalpui a pawimawh hle.  Hun puma rawngbawltu nilo KTP memberte hian kan ngaihdan kan siamrem a tul hle awm e.

    Eizawnna hian Rawngbawlna a tihchhiat a rem lo ang bawkin rawngbawlna hian kan eizawnna a tih chhiat a hlauhawm hle a.. Chutih rual chuan tunlai hian kan ramah mithiam zawk an lo chhuak zel a.. Mahni eizawnna ngai pawimawh tur leh rawngbawlna tih chhuanlama eizawnna (hnathawhna) lam kalsan reng lo tur leh rinawm leh taima taka mahni hna thawh inzirtirna a lian chho ta hle mai a,  hei hi thil pawimawh leh tha tak a ni.  Rawngbawlna programme tam tak kan neih lai hian kan eizawnna (kan hnathawhna) hian a tuar ang tih hlau tak chunga rinawm taka kan thawh hi a tul takzet mai.   Hetihlai hian kan eizawnna lam ngaihpawimawh lutuk avanga Pathian rawng kan bawlnaina tuar tir khawpa rawngbawlna kan thlahthlam chuan a pawi thui thei hle thung ang.
    Eizawnna kan hrilhfiah dan aiin Rawngbawlna kan hriatfiah danin kawngro a su thui zawk angem aw..?? tih erawh chu a ngaihtuah theih hle awm e.
    Eizawnna hi amahin rawngbawlna a ni mai lova.. rawngbawlna erawh chu eizawnnaah hian a lakluh theih tlat si.  Rawngbawltuin taima tak leh thahnemngai taka hna a thawha ei a zawn chuan chhungkua leh khawtlang leh ram tan chhawrnaawm tak a ni thin a.  Chu mai bakah Pathian ram zauhna kawngah pawh a thawk hlawk thei hle ang.  Chumi leh lamah chiah chuan eizawngtu zawng zawng hi Pathian rawngbawltu an ni lem lo tih chu hriat tlan vek thil a ni ngei ang.
    Rawngbawltute hian kan eizawnna tibuai lova kan rawngbawlhna kan thawh a tul hle mai.  Chutih rual erawh chuan kan eizawnna hian kan rawngbawlna a tibuai anih erawh chuan eizawnna dang kan dap mai pawh a tha zawkin a rinawm.  Hei hian a hrilhfiah chiang tak chu Eizawnna chu chi hrang tam tak a awm a.  Pathian rawngbawlnaah erawh chuan peng tamtak nei ve tho mahse pakhat chiah a ni thung.
    Channa tellovin Pathian rawng a bawl theih loh a.  Chan tlang ngam lote chuan Pathian ropuina leh a inpuanchhuahna an hmu thei lo.  Abrahaman a fapa Isaaka a chan tlang ngam hnuah Pathianin inthawina turin beram a pe a. Daniela thian ten Meipuia paihluh an ngam mai ni lova meipui chhung an luh hnuah Pathianin a chhan chhuak a.  Daniela ngei pawh Sakeibaknei puk a luhchilh hnuah chauh Sakeibakneite kha a chih a nih kha. Chan tlang ngamna phenah Pathian ropuina hi a lo lang thin a ni.